Nos lavabos pódese reducir o caudal até 2 L/min sen perda de confort mediante un perlizador ou aireador axeitado, ou regulando o caudal mediante a chave de paso, ate conseguir un caudal inferior a 4 L/min.
As cisternas de descarga única non permiten seleccionar un caudal axeitado a cada necesidade. Pódese reducir o volume das diferentes descargas, axustando o nivel máximo de auga da cisterna, ou simplemente introducindo un par de botellas con auga dentro. Instalar un mecanismo de dobre descarga reduce o consumo nun 30-50% e recupérase o seu custo en menos de dous anos.
É moi conveniente lembrar a necesidade dun uso responsable da auga. Se en lugares públicos non hai distintivos neste sentido, rotula ou solicita que rotulen mensaxes de uso correcto dos equipamentos e aforro da auga.
Non esquezas que toda a auga da traída é auga potábel. Para o retrete podes aproveitar calquera outra auga que teñas na casa, como a do deshumificador, a da ducha mentres non chega a auga quente, ou calquera auga «case limpa» da cociña. Aproveita todas as oportunidades para reducir a túa pegada hídrica!
En todos os establecementos públicos debería haber indicacións chamando ao uso responsábel da auga, e mesmo informando do consumo dos equipos dispoñibles.
Incluso na vivenda particular non sobran: a calquera de nós nos ven ben lembrarnos de cando en vez a importancia de aforrar auga. Co aforro de auga ninguén perde. Gaña o medio ambiente e a sociedade!
Un estudo levado a cabo na UDC entre 2006 e 2016 nun total de 125 vivendas da área da Coruña, mostrou que unicamente o 30% das vivendas dispoñan de cisternas con mecanismo de dobre descarga. Porén, este elemento mostrouse como un factor eficaz para reducir o consumo, xa que as vivendas con cisternas de dobre descarga deron un consumo neste capítulo significativamente inferior (nunha media do 33%) en relación con aquelas outras que non o tiñan. Segundo estimacións xerais, o aforro pode chegar ao 50%.
Outros consellos para un uso máis ecolóxico do inodoro: